दातन कलेवो

दातन कलेवो 

उठो म्हारी अंतरलाडी करोनी दातणीयो 

जळभर झारीये बनडी केळीरो दातन 

इसडो दातन थारा नाईजी करावे 

नाईजी करावे म्हारी बाळक बनडी करे ॥१ ॥

उठो म्हारी बाळक बनडी करो नी कलेवो, 

थंडी तो रोटी ये बनडी लोणी रोलचको

इसडो कलेवो थारा माताजी करावे, 

माताजी करावे म्हारी बाळक बनडी करे ॥२ ॥

उठो म्हारी बाळक बनडी करोनी भोजणीया, 

लाडू तो पेडा ए बनडी सरस जलेबी

इसडो भोजनीयो थारी भोजाया करावे, 

भोजाया करावे म्हारी बाळक बनडी करे ॥३ ।।

उठो म्हारी बाळक बनडी करोनी मोचनीया, 

लूंग सुपारी ए बनडी पानारा बिडला

इसडो मोचनीयो थारी बेनडल्या करावे, 

बेनडल्या करावे म्हारी बाळक बनडी चाबे ॥४ ।।

उठो म्हारी अंतर लाडी करोनी पोढणीयो, 

हिंगळू तो ढोल्यो ए बनडी सरस पथरणो

इसडो पोढणीयो थारा दासीजी करावे, 

दासीजी करावे म्हारी बाळक बनडी करे ॥५ ॥